Wakahwinha

Wakahwinha nezuro nenharo,

Pawakashama muromo semvuu.

Wakahwinha sarudzo,

Ukahwinha hondo.

Wakahwinha kusadzosera chenji,

Ukahwinha kunyepedzera kukanganwa.

Wakahwinha zvigaro,

Asi denga ucharihwinha here?

Muchechi mazara vapoteri

Vatendi vagari venyika inonzi Kristu. Vagari venyika inonzi Kristu vanonzi maKristu, havanzi maRoma, mapositori, maDhachi kana mamwe mazita emachechi. MaKristu vane simba nekodzero dzavo dzinongowanikwa chete kana vachigara munyika iyi inonzi Kristu. MaKristu ane zvitupa, mapasipoti, mapasswords nemasimba anoenderana nekuve vagari venyika inonzi Kristu nekuti “vose vakatenda kunaKristu, Mwari akavapa simba rekuti vanzi vana vake.” Kana maKristu akabuda munyika inonzi Kristu, kureva kuti kana akasagara muna Jesu nemashoko aJesu asingagare mavari, maKristu anenge ave vatorwa kuna Jesu, uye kukumbira kwavo kana vari vatorwa vasingazivikanwe naJesu, vasina identity munaJesu kunenge kusina simba (authority) nekuti havasi vake, vanenge vari vatorwa. Kune imwe nzvimbo vamwe vana vemumwe muprista vakada kuzviita vagary venyika inonzi Jesu ndokuedza kuraira mweya wakaipa nezita raJesu kuti ubude, asi mweya wakaipa wakavaudza kuti waiziva kuti Jesu ndiani, asi wakanga usingazive vanhu ava vakanga vachida kuudzinga vachishandisa zita raJesu. Nhasi uno vazhinji vedu tave vanhu vekuda kuonekwa sekunge tiri vagari vemunyika inonzi Jesu, asi isu tisina hukama naye, tisingazivikanwe naye. Tave vapoteri vasinei nezvenyika inonzi Jesu iyi nekuti tinoziva kuti tine imwe nyika yatakabva kwairi, uye yatichadzokera kwairi nekuti ndiyo nyika ine mutauro wedu, tsika dzedu nehunhu hwedu, kwete nyika yatakapotera iyi. Vapoteri vemunyika inonzi Jesu havanei nekuzvipira muzvinhu zvenyika iyi nekuti haisi nyika yavo. Vakauya munyika inonzi Jesu iyi kuti vangowana zvavari kuda, kana zvangoita vobva vadzokera kwavo chaiko. Tave nemaKristu anovimba nechechi namufundisi wavo kudarika Kristu. Tave nemaKristu anovimba nemari yavo kudarika Jesu. Tave nemaKristu anovimba neyunifomu nekungopotsera-potsera mashoko ane chekuita naMwari – vachiti hameni, Ishe ngavakudzwe asi mwoyo yavo isinei naKristu. MaKristu nhasi ave kutsvaga kushandisa chechi kuti vatsige nekugamuchirika munyika. Asi kana Kristu ari nyika yatinogara, hunhu hwedu haufanirwe kushanduka nekuda kwenzvimbo serwaivhi. Nechikonzero ichi, Kristu wacho, muridzi wenyika yazara vapoteri ari kuti ndinozviziva kuti munyika mangu mazara vapoteri vasinei neni, vasinganzwe mwoyo yavo kupisira ini uye vanondida kana pane zvavanongoda kwandiri. Ari kuti regai zvikurirane sora nezviyo – ndichazozvigadzirisa pakukohwa. Jesu muridzi wenyika inogara maKristu ari kuti, “Kana muchigara mandiri, nemashoko angu achigara mamuri, kumbirai zvamunoda muchazviitirwa.” Vapoteri nevatorwa vakahwanda munyika inonzi Jesu – hamuna chamunowana munaJesu kana musina kurasa hunhu, zvitupa, mutauro netsika dzenyika yamaimborarama mairi. Kuwana zvamunoda munaJesu hakubve pakunamatirwa nemuporofita, asi kunobva pakuti wave mugari wemunaJesu asisafunge zvekunyika yaakabva here.

Ndakaregereswa doro nembwa

Nyaya yekuda doro kudarika mukadzi wangu nevana yakazondiparira. Ndakaregera doro, asi chakandiregeresa doro imbwa. Ndichiri kuyeuka kuti ndakanga ndashaudha mukadzi wangu nekuda kuita mupurisa wangu. Mukadzi wangu akanga ave kunditadzisa kunwa doro rangu ndakasununguka. Kuitawo here ikoko, kuti pano nepano message yapinda mufoni, “Muri kuuya nguvai?” kana kuti, “Muri kubvunzwa nemwana kuti muchasvika nguvai?” Ko ndini here ndine makey ehope dzavo? Mukadzi wangu akazopedzisira anyarara, aona kuti nyaya yekuti ndirambane nedoro haiite. After all iye ndiye mainini vakazouya mushure. Ini ndakatanga kuda doro, ndikatochata nedoro iye akazouya mumashure. Handiti kana pandakamunyenga ndakanga ndakadhakwa, ndichitobatsirwa nedoro, saka chii chingazoita kuti ndimborega kunwa doro iro riri iro peturu neshamwari yangu? Rimwe zuva mudzimai wangu akati, “MuRungu watinoshanda naye ave kudzokera kunyika kwake, saka ari kutengesa zvinhu.” Takaenda tese kunoona zvinhu zvaitengeswa nemuRungu, tikatenga izvo nezvozvo. Asi tapedza kutenga, nekuti ini ndakanga ndakamirirwa naMaiguru Doro, ndakasiya mudzimai wangu achironga zvekutakura zvinhu kuti zviende kumba. Musi uyu waive musi weChishanu. Chishanu ndiro zuva chairo rekudhakwa nekuti unoziva kuti uneMugovera neSvondo uchifadzwa nedoro. Nemusi weChishanu uyu, ndakazosvika kumba kuma11 husiku. Ndakawana mhuri yese yarara. Ndakapinda mukicheni, ndikatambirwa nembwa chena, yakanaka. Ndakashamisika kuti ndakaona runako rwembwa iyi, nekuti nguva zhinji handione runako rwezvinhu zvine makumbo mana kunze kwekunge iri motokari. Ndakashaya kuti imbwa iyi yakanga yabva kupi. Kana nedoro randakanga ndanwa rakambopera zvishoma. Ndakati, asi ndapinda mumba musirimo? Nekuti kunze kwembwa, mumba medu makanga marongedzwa patsva nezvinhu zviye zvakanga zvatengwa kumuRungu. Imbwa iye yakanga ichindifarira, asi ini ndakanga ndisiri kuda kuti iswedere pedyo neni. Saka ndakafambisa ndichiisiya kumashure ndichienda kubhedhurumu. Ndakasvikomutsa mudzimai wangu ndikati, “Iwe, imbwa iyo ndeyani uye iri kudei mumba?” Mudzimai wangu akati, “Maswera sei daddy? Imbwa taipihwa naMargaret kumuRungu kuye kwatatenga zvinhu. Vana venyu vari kuifarira chaizvo uye inotamba navo zvakanaka. Yakatireinwa chaizvo.” Ndakatura befu ndikati, “Asi handidi kuti igare mumba. Mutenge chimba chembwa, imbwa yenyu igare nekurara panze.” Zuva rakatevera, uri musi weMugovera ndakaenda zvangu kunonwa ndikasiya mudzimai nevana vachifara nembwa yavo Ranger. Kutaura chokwadi, ndakanzwa jerasi nekuti ndakaona sekuti vakanga vachida imbwa kundidarika. Ndakati rega ndigoona kuti zvinopera sei. Ndakanohunwa chaizvo zvekuti kana boys dzangu dzakanga dzave kundityira kuti ndichakwanisa kudhiraivha mota ndikasvika kumba zvakanaka here. Asi ndakadhiraivha, ndikasvika kumba. Ndasvika pamba, ndakabuda mumota kuti ndinovhura gedhi. Ndakavhura gedhi, ndichibva ndadzokera mumota. Chandisina kuziva ndechekuti pandakavhura door remota, Ranger, imbwa yemuRungu iye yakanga yanopinda mumota nedoor rangu radhiraivha randakanga ndasiya rakashama, ikanogara kumashure kwemota. Ndizvo zvayakanga yajaira kumba kwayo. Saka ini ndakapinda mumota ndikasimudza mota kuti ndiipinze mukati. Mota yapinda mukati, ndakatsika mabhureki kuti ndichidzokera kunovhara gedhi. Asi ndakatsikisa mabhureki zvekuti kana neniwo ndakasaidzirwa kumberi nesimba remota. Ipapo, Ranger yakanga yakagara kusiti rekumashure, yakasaidzirwa kumberi ikasvikowira pamakumbo angu ichichema. Ini semunhu akanga achifunga kuti ndiri ndega mumota, ndakarohwa nehana zvekuti ndakaridza mhere ndichitiza kubva mumota makanga mapinda “chinhu.” Ndakangobuda ndichimhanya nemugwagwa ndichibararadza zvekuti vanhu vazhinji vakamuka vachifunga kuti ndiri kurwiswa nematsotsi. Asi chakazoita kuti ndifende ndechekuti, pandakabuda ndichitiza nemugwagwa, chinhu chandakanga ndichitiza chiye, chakatanga kunditevera chichindimhanyisa. Ipapo ndakabva ndangofenda. Pandakazomuka ndave mumba, vanhu vachinditsanangurira zvakanga zvaitika, ndakanyara kudarika imbwa yaKapfupi yakwira bhazi. Ndakabva ndaregera kunwa doro. Ranger ndiyo yave shamwari yangu, uye ndave kuwana nguva yekutandara nevana nemudzimai wangu.

I owe God $666.41c

I owe God $666.41c
And lots more money.
I owe God a lot.
I owe Him love
I owe Him life
I owe Him the truth
I owe God explanations
And confessions for sins
And apologies for pride
And for wanting to steal his Glory!